सरकारले सार्वजनिक यातायातको भाडादरमा पुनः वृद्धि गरेको छ । नयाँ सरकार बनेको महिना दिनमै दोस्रो पटक सार्वजनिक यातायातको भाडा बढाइएको हो ।
बिज्ञापन
भौतिक पूर्वाधार मन्त्री सुनिल लम्सालको मन्त्रिस्तरीय निर्णयबाट अन्तर प्रदेश चल्ने यात्रुवाहक र ढुवानीका दुवै सवारीसाधनमा ५ प्रतिशतले भाडा वृद्धि गरिएको हो । यही १२ गते भौतिक पूर्वाधार तथा यातायात मन्त्रालयको सैद्धान्तिक सहमति लिएर यात्रुवाहक तथा मालवाहक सवारी साधनमा ५ प्रतिशतले भाडा वृद्धि गरिएको विभागको सूचनामा उल्लेख छ । डिजेलको मूल्यवृद्धिका कारण भाडादर समायोजन गरिएको विभागले जनाएको छ ।
बिज्ञापन
यस अघि गत चैत्र २५ मा यात्रुवाहक सवारीमा १६ दशमलव ७१ प्रतिशत र मालवाहक सवारीमा क्षेत्रअनुसार २१ दशमलव ६८ प्रतिशतसम्म भाडा बढाएको थियो । यातायात व्यवस्था विभागले इन्धनको मूल्य वृद्धि भएसँगै फेरि सार्वजनिक यातायातको भाडा बढाएको छ । विभागले अन्तरप्रदेशमा सञ्चालन हुने सार्वजनिक यातायातमा भाडा बढाएको हो । बढेको भाडा आजैदेखि लागु हुने विभागले जनाएको छ ।
यसअघि भाडा समायोजन गर्दा डिजेलको औसत बजार मूल्य प्रतिलिटर १८० रुपैयाँ ८३ पैसा रहेकोमा हाल ५५ रुपैयाँले वृद्धि भई २३५ रुपैयाँ ८३ पैसा कायम भएको छ । इन्धनमा भएको यो ३० दशमलव ४१ प्रतिशतको वृद्धिलाई नै भाडा बढाउनुपर्ने मुख्य आधार मानिएको छ । यो नयाँ निर्णयसँगै लामो दूरीका यात्रु तथा व्यवसायीहरू प्रत्यक्ष प्रभावित हुने देखिएका छन् ।
बिज्ञापन
